گوڵاڵە پێنجوێنی خانمە شاعیری دیاری شارۆچکەی پێنجوێن کە ساڵانێکە تێکەڵ بەدنیای ئەدەبو هونەری شعرنوسین بوە،لەو بوارەدا خاوەنی دەیان نوسینی شعریەو لەچەندین کۆڕو سیمیناری جیاوازدا بە شعرەکانی توانیویەتی کەسایەتی خۆی وەک ئافرەتێکی خاوەن قەڵەم نیشان بدات،ڕووماڵ بەچەند پرسیارێک ئەم خانمە زیاتر بە ئێوە ئاشنا دەکات،
ڕووماڵ؛ بۆچی شعرتان وەک هونەری نوسین هەڵبژارد؟
و؛ شعر تێکەڵبونێکی ڕاستە قینەی هەیە لەگەڵ زاتی مرۆڤداو پەلی خەیاڵی مرۆڤ لەگەڵیدا دەڕوات تا ئەوسنورەی کە نەجوگرافیایەک دەمێنێت و نەسنوریک بۆ دەربازبون لێی.
ڕووماڵ؛ شعردەتوانێت مەعریفە بەرهەم بێنێت؟وە مەعریفە چۆن دەتوانێت هاوکاری شاعیر بکات لەنوسینی شعردا؟
و؛ لەڕابردودا وەڵامی ئەم پرسیارە ڕون تر دەردەکەوێت.بەڵێ شعر خاڵی نیە لەمەعریفە ئەگەر سەیری نوسینەکانی نالی و مەولەوی و ئەحمەدی خانی و دەیانی دیکە بکەین تێ دەگەین مەعریفە ڕۆڵی چۆن گێراوە لە نوسینی ئەو بەرهەمانەدا.بەپێچەوانەوە شعر تەنیکی یان خەیاڵێکی دابڕاو نیە و خۆی خۆی بەرهەم بێنێت،شاعیر بەبێ مەعریفەیەکی قوڵ ناتوانێت دەقی ئامانجدار بنوسێت،بۆیە گرنگە بەرلەوەی شاعیربین خوێنەرێکی باش بین بۆئەوەی کەرەستەکانی بیناکردنی نوسین لامان ئاسن دەست کەوێت و کرچوکاڵی بەنوسینەکانمانەوە دیارنەبێت.
ڕووماڵ؛شعری ئێستە چۆن دەبینیت؟
و؛لەڕاستیدا من شاعیرم نەک ڕەخنەگر ئەوە ئەرکی ڕەخنەگرە لەهەر بەلاڕێدا بردنێک شاعیر ئاگادارکاتەوە،غیابی ڕەخنە داینەمۆی گەشەی بێ ئامانجی شعرە لەم سەردەمەدا،شعرو ڕەخنە دوالیزمێکی تەواوکارن لەبەر ئەوە نەبونی ڕەخنەگری جدی بۆشاییەکی گەورە لەبەرهەم هێنانی هەر نوسینێکی ئەدەبیدا دروست دەکات
ڕووماڵ؛کەواتە تاچەند لە شعری شاعیرانی ئێسته ڕازیت؟
و؛ بەدڵنیاییەوە بڵێم ئێستە هێندەی شاعیرمان هەیە خوێنەرمان نیە ئەمەش بۆخۆی گرفتە زۆری چاپکراوەکانیش ئەوەمان پێ دەڵێت کە لە ئێستەدا نوسین تەنها بۆناوو کاغەز ڕەشکردنەوەیە نەک مەبەست و ئامانجی گشتی.
ڕووماڵ؛شعر دەتوانێیت وەڵامی ئەم دنیا ئاڵۆزەی ئێستە بداتەوە؟
و؛ لەگوماندام ئاخر تەکنەلۆجیا بوارنادات خەڵکی بەدوای وەڵامەکاندا بگەڕێن.شعر لەبنەمادا ئەرکی دەسکاری کردنی واقعە و ڕەنگڕێژ کردنیەتی بە فڵچەی خۆی،بەڵام جیهانی نوێ هێندە ئاڵۆزو تێک چڕژاوە بڕوام وایە شعر نەتوانێت دەست بۆ زۆر پرسی کەینونی ببات.
ڕووماڵ:هەندێ کەس پێیان وایە لەئێستەدا شعر هونەرێکی ئاسانە بۆنوسین بۆیە زۆرکەسی بەخۆوە سەرقاڵ کردوە؟
و؛ هونەر بەگشتی کارێکی قورسە بۆئەوانەی بەقوڵی لێی دەڕوانن.هاوکات کارێکی ئاسانیشە بۆئەوانەی بەکرچوکاڵی دەنوسن،تۆدەتوانی شێرکۆ بێکەس بە تازە شاعیرێکی ئێستە بەراورد کەیت؟کەواتە هونەری شعرلای شێرکۆ کارێکەو لای گەنجێکی تازە پێگەشتوش کارێکی دیکەیە
جیاوازی نوسینی شعرلەگەڵ نوسینەکانی دیکەدا ڕونە شعر پێویستی بەخەیاڵی قوڵ و سەرکێشی بەردەوامە تەنها بە مەعریفە شعر کامڵ نابێت هەرچۆن تەنهابە خەیاڵیش نوسین نابێتە شیعر.
ڕووماڵ؛وەک دوا پرسیار شعر چشتێکی پێ بەخشیویت و چ شتێکی لێ سەندویتەوە؟
و؛ زۆرشتی پێ بەخشیم هاوکات زۆرشتیشی لێ سەندمەوە بەڵام ئەوەی لەشعردا دەستم کەوت نرخی زیاتربو لەلام وەک ئەوەی لەدەستم دا.نوسین ئارەزویەکی هەمیشەیی ژیانم بوە بڕوام وایە مرۆڤ تەنها لەڕێگەی خوێندنەوەو نوسینەوە دەتوانێت لەقوڵاییەکانی ژیان تێ بگات،شعر فێری کردم ژیان دەتوانێت جوانتربێت لەوەی کە هەیە،فێری کردم گەردون بۆمرۆڤ ڕاخراوە،فێری کردم پلەوپایەو بون و نەبون ناتوانن جیاوازی مرۆڤەکان تۆخ کەنەوە کەسێک بکەنە سەردارو کەسێک کۆیلە،شعر جوگرافیایەکە بۆئەوەی مرۆڤ بەئاسودەیی سنورەکانی تێ پەڕێنێت بۆگەشتن بەخۆشبەختی ئەبەدی……..
بەیان کەریم محمود پێنجوێنی لە١١/ ٣/ ١٩٧٠ لە گەرەکی بەرکێوی پێنجوین لەدایک بووە تا پۆلی شەشی ئامادەیی خویندوە ناسراوە (گوڵاڵە پێنجوێنی )
هەر لە منداڵیەوە خولیای ئەدەب و کاری هونەری بوە، بەڵام بەهۆی ڕێگری کۆمەڵگاوە نەیتوانیوە بەردەوام بێت تانزیکەی ساڵانی “٢٠١٠” دواتر بە ئاشکرا بەردەوام بێت لە نوسینی شیعرو چەندین کۆڕی ئەنجامداوە و بەشداری چەند ڤیستیڤاڵ و سیمیناری کردوە،چەندان شیعری بۆ پێشمەرگەو کورد و عەشق نوسیوەو لە گۆڤارو ڕۆژنامەکاندا بڵاوکراونەتەوە
