ئیمارات سەرکۆنەی هێرشەکانی ئێران بۆسەر هەرێمی کوردستان دەکات

وەزارەتی دەرەوەی ئیمارات بە توندی سەرکۆنەی هێرشە مووشەکییەکانی ئێرانی کرد بۆ سەر بارەگاکانی پێشمەرگەی هەرێمی کوردستان کە بەهۆیەوە دەیان پێشمەرگە شەهید و برینداربوون، هێرشەکان بە "ناڕەوە و تیرۆریستی" ناودەبەن و بە پێشهاتێکی مەترسیدار و پێشێلکردنی یاسا نێودەوڵەتییەکانی دەزانن.

دەربڕینی هاوسۆزی بۆ عێراق و هەرێمی کوردستان

وەزارەتەکە لە ڕاگەیێنراوێکدا دەڵێت: ئیمارات هاوسۆزی تەواوی خۆی بۆ کۆماری عێراق و حکومەتی هەرێمی کوردستان دووپاتدەکاتەوە، هاوکات جەخت لە پشتیوانی خۆی دەکاتەوە، بۆ هەموو ئەو ڕێوشوێنانەی کە بۆ پاراستنی ئاسایش و سەلامەتی و سەقامگیری لە هەرێمی کوردستان گیراونەتەبەر.

سەرەخۆشی لە کەسوکاری شەهیدان

هاوکات وەزارەتی دەرەوەی ئیمارات سەرەخۆشی لە کەسوکاری شەهیدان و حکومەتی هەرێمی کوردستان دەکات بەبۆنەی شەهیدبوون و برینداربوونی پێشمەرگەکانەوە و هیوای زوو چاکبوونەوەی بۆ بریندارەکان دەخوازن.