بڕیارە ڕۆژی شەممە، ئەنجوومەنی نوێنەرانی عێراق کۆبوونەوەیەکی تایبەت ئەنجام بدات. بەپێی بەرنامەی کار، تەوەرەی سەرەکیی دانیشتنەکە بریتی دەبێت لە گفتوگۆکردن لەبارەی ئاڵنگارییە ئەمنییەکانی عێراق و ناوچەکە، کە تێیدا فەرماندە باڵا ئەمنییەکان ئامادە دەبن.

وەزارەتى دارایی عێراق، ڕایگەیاند، "دۆخى دارایی جێگیرە و کێشەى کەمى نەختینە نییە و ڕێکارەکانی خەرجکردن بەبێ هیچ قەیرانێکى دارایی بە ئاسانی بەڕێوەدەچێت."

قاسم ئەعرەجى، بەرپرسانى ئێران دڵنیادەکاتەوە، ڕێگەنادەن گرووپەکانى ئۆپۆزسیۆن لە خاکى عێراقەوە هێرش بکەنە سەر وڵاتەکەیان دەشڵێت، وەزارەتى ناوخۆى هەرێمى کوردستان بۆ بەهێزکردنى کۆنترۆڵکردن لە میحوەرى هەولێر هێز دەنێرێتە سەر سنوور.

نووسینگەی مەرجەعی باڵای شیعەکان لە نەجەف، ڕاگەیەندراوێکیدا لەبارەی هێرشە سەربازییەکانی سەر خاکی ئێران بڵاودەکاتەوە و هۆشداری دەدات لە دروستبوونی پشێویەکی درێژخایەن کە زیان بە بەرژەوەندییەکانی تەواوی ناوچەکە دەگەیەنێت.

میدیای فەرمیی ئێران بڵاویکردەوە، لە ماوەی کەمتر لە 72 کاتژمێری ڕابردوودا، بەهۆی هێرشەکانی ئەمریکا و ئیسرائیلەوە 13 کەس لە پارێزگای ورمێی ڕۆژهەڵاتی کوردستان کوژراون.

گەورەترین پاڵاوگەی نەوتی ناوخۆیی سعوودیە لە ناوچەی ڕەئس تەنورە لە ڕێگەی مووشەک یان تەنێکی فڕیوەوە کراوەتە ئامانج و بەهۆیەوە زیان بە بەشێکی دامەزراوەکانی گەیشتووە.

محەممەد بن عەبدولڕەحمان ئال سانی، سەرۆکوەزیران و وەزیری دەرەوەی قەتەڕ لە پەیوەندییەکی تەلەفۆنیدا لەگەڵ عەباس عێراقچی، وەزیری دەرەوەی ئێران داوای لە ئێران کرد، هێرش بۆسەر وڵاتانی ناوچەکە ڕابگرێت، جەختی لەوەش کردەوە، ئێران لە ڕێگەی هێرشەکانیەوە بۆسەر وڵاتانی کەنداو، هەوڵدەدات زیان بە دراوسێکانی بگەیەنێت و پەلکێشیان بکاتە ناو جەنگێکەوە کە جەنگى ئەوان نیین.

ئەمریکا و ئیسرائیل سەرلەبەیانیی ڕۆژی 28ی شوباتی 2026 لە ئۆپەراسیۆنێکی هاوبەش و هەماهەنگدا، زنجیرەیەک هێرشی مووشەکی و ئاسمانییان کردە سەر کۆماری ئیسلامیی ئێران و چەندین ناوەند و بارەگای سەربازی و ئەمنی و حکومییان کردە ئامانج.