وەزارەتى دارایی عێراق، ڕایگەیاند، "دۆخى دارایی جێگیرە و کێشەى کەمى نەختینە نییە و ڕێکارەکانی خەرجکردن بەبێ هیچ قەیرانێکى دارایی بە ئاسانی بەڕێوەدەچێت."
کێشەی کەمی نەختینەی دارایی لە ئارادا نییە
وەزارەتى دارایی لە ڕاگەیێنراوێکدا، ئەوە ڕەتیدەکاتەوە سەبارەت بەوەی بەهۆی كەمیی نەختینەی داراییەوە، خەرجكردنی مووچەی چاودێریی كۆمەڵایەتی بۆ مانگی ئازار دواكەوتووە و جەختدەکاتەوە، ئەوە بەتەواوەتی دوورە لە ڕاستی و پشت بە هیچ واقیعێكی فەرمی نابەستن".
تەموولیکردنی مووچەی دەستیپێکردووە
ئاماژە بەوەشکراوە، فەرمانگەی ژمێریاریی بەشێوەی کردارى دەستی كردووە بە تەمویلكردنی مووچە و تەرخانكراوەكان، بە هەماهەنگی لەگەڵ لایەنە پەیوەندیدارەکان بە مەبەستی گەیشتنی شایستەكان لە وادەی دیاریكراوى خۆیدا.
دۆخی دارایی دەوڵەت سەقامگیرە
هەروەها وەزارەتى دارایی عێراق، جەختلەوە دەکاتەوە، کە دۆخی دارایی دەوڵەت سەقامگیرە و تەرخانكراوەكانی تایبەت بە چاودێریی كۆمەڵایەتی بەتەواوەتی لەچوارچێوەی بودجەدا مسۆگەرە و هیچ قەیران و كۆسپێكی دارایی بوونى نییە.
هاوکات، وەزارەتى دارایی عێراق ئەوەشى ڕوونکردووەتەوە، ڕێکارەکانی خەرجکردن بەبێ هیچ قەیرانێکی دارایی بە ئاسانی بەڕێوەدەچێت.
